Believe Session Txikon 7

150 lagun inguru bildu dira BIC Bizkaia Ezkerraldeak, Obra Social “la Caixa” laguntzarekin, antolatutako “Believe Session” ekimenaren II. edizioan Ekiteko beste modu batzuk ezagutzeko topaketa horretan protagonistek garapenaren alorrean izan dituzten esperientziak eta aukerak aurkeztu dituzte eta, horrez gain, toki esparruan amets paraleloak dituzten ekintzaileen arteko lankidetzarako apustua ere izan da. Oraingo honetan, Alex Txikon alpinista izan da “Believe Session” saioko hizlari nagusia, eta ekintzailetzaren mendiaren tontorrera daraman bidean izandako garapen profesionalaren eta pertsonalaren berri eman die bertara hurbiltzen diren guztiei. Hori guztia, giro atsegin eta lasaian, eta are gehiago orain, euskal mendizalea oxigenorik gabe Everestera neguan igotzeko ahaleginetik, bizitzako esperientzia gehiagoz beteta, itzuli berri den honetan.

Bigarren edizio hau startupei eta mendiari buruzkoa izan da, berrikuntzaren, ekintzailetzaren eta tokiko aberastasun sorkuntzaren adibide gisa, horiek dituzten forma guztietan. Iñaki Calvo enpresa guneko zuzendari gerenteak azaldu duenez, “egunero aurkitzen ditugunen desberdinak izango diren ekintzailetza motak erakutsi nahi ditugu, ez dagoelako gauzak egiteko modu bakarra eta denek merezi dutelako aintzatespena. Alex Txikon superazio adibide garbia da, amets berriak bilatzearen, talde lanaren eta goi mailako asmoaren eredu, hain zuzen ere. Laburbilduz, pertsona ekintzaile baten adibide argia. Asko ikasi dugu mendian izan dituen esperientzietatik eta bere espedizio guztietan aurrean aurkitzen dituen erronkei aurre egiteko moduetatik”.

Euskal alpinistaren hitzaldiaren ondoren, “Believe Session” ekimenak mahai ingurua jaso du. Bertan parte hartuko dutenak hauek izango dira: Jon Uriarte, orain denbora gutxi eBayk bereganatu duen eta sarrerak sal-erosteko Stubhub plataforma digitalaren barruan dagoen Ticketbisen sortzailea; Leire Atxa, zarataren eta hots kutsaduraren kontrolerako soluzioen bilaketan ari den Noismarteko gerentea; Izaskun Artetxe BIC Bizkaia Ezkerraldeko presidentea, eta Carlos Ruiz de Arcaute, enpresa zuzendaria eta Euskadi-Kantabriako Ekintzailetza koordinatzailea Caixabanken, ekintzaileen munduan erreferente den erakundea Entitatean eskaintzen dituzten laguntzak direla eta; horien artean, proiektuei laguntza ekonomiko zuzenak eman, ekintzaileei finantzaketa ereduak eskaini, enpresen kapitaletan parte hartzen Caixa Capital Risc programaren bitartez eta formakuntza eskaintzen. Enpresa mundutik datozen lau ikuspuntu, garapen profesional desberdinekoak, baina guztiak ere, gure ingurunean aberastasuna sortzeko esfortzua eta sakrifizioa erakutsi dutenak “.

Iñaki Calvok argi eta garbi dauka “beharrezkoa dela inguruan daukagun bertako talentua balioan jartzea, eta horren aldeko apustua egiten dugu. Ez dago ekintzailetzarako errezeta magikorik, eta “Believe Session” honetan ezagutuko ditugun esperientzia guztiak aberasgarriak izango dira guztiontzat”.

Bere aldetik, Carlos Ruiz de Arcautek azaldu duenez, “ekintzaileek egunero esaten digute enpresaren inguruko ekosisteman dauden aktoreentzako topaketak beharrezkoak direla. Ekintzaileek, inbertitzaileek, finantzaketa ematen dutenek eta erakundeek parte hartu behar dute ekimen hauetan esperientziak eta ideia berritzaileak partekatzeko, eta finantzaketa konponbideak ahalbidetzeko”.

Alex Txikoni buruz

Alex Txikon Bizkaiko “multikirolaria” da (Lemoa, 1981. 13 anai-arreba dira eta bera txikiena da) eta oso abenturazalea da. Herri Kirolak (aizkora bereziki) egiten ditu entrenamendu gisa.

Hala ere, alpinista da bere alde ezagunena. Alex Txikonek hamaika “zortzimila” igo ditu dagoeneko, eta Antartida, Pakistanen eta Indian eskalatu egin du. 21 urte zituela bere lehenengo “zortzimila” lortu zuen, Broad Peak (8.051m) Karakorumen (Pakistan), hain zuzen ere. Handik hona, 30 espedizioetan parte hartu du, eta gaur egun, neguko espedizioetan ari da bereziki; izan ere, munduko onenen artean dago modalitate horretan.

2016ko otsailaren 26an Nanga Parbat (8.126), “Montaña Asesina” izenarekin ezaguna, oxigeno artifizialik gabe lortu zuen lehena izan zen; erronka horretan berarekin joan ziren Ali ‘Sadpara’ pakistandarra eta Simone Mori italiarra. Azkeneko neguan, Txikonek Everesteko tontorrera heltzen saiatu zen oxigeno artifizialik gabe baina ezinezkoa izan zen klimatologia-baldintzak zirela eta.

Azkenik, Alex Txikon Estatu eta mundu mailako komunikatzaile aparta da.